აჭარაში „ნაციონალური მოძრაობის“ ერთ-ერთ ღონისძიებაზე, სანდრა რულოვსთან, ადგილობრივების ერთი ჯგუფი მივიდა და მას დამნაშავე უწოდა.
საქართველოს ყოფილი პირველი ლედი და „ნაციონალური მოძრაობის“ ზუგდიდის მაჟორიტარობის კანდიდატი, ქალთა ორგანიზაციის 2 წლის იუბილეს ესწრებოდა. სიტუაცია მალე განიმუხტა და შეხვედრა დიალოგის ფორმატში გაგრძელდა. ღონისძიებაზე მისული ქალბატონებიდან ერთ-ერთი „ნაცინალურ მოძრაობას“ მისი შვილის ციხეში უკანონოდ ჩასმისა და იარაღის ჩადების გამო ადანაშაულებდა.
მეორემ კი 2004 წლის შემთხვევა გაიხსენა და თქვა რომ მისი შვილი, რომელიც სოფლის გამგებელი იყო, პოლიტიკური მოსაზრებების გამო „ნაციონალური მოძრაობის“ ხელისუფლებამ ნარკოტიკების შენახვის ბრალდებით უკანონოდ დააპატიმრა, რასაც მისი ჯანმრთელობის გაუარესება მოჰყვა. შედეგად სოფელ კახაბრის ყოფილი გამგებელი გარდაიცვალა. არც სანდრა რულოვსს და არც „ნაციონალური მოძრაობის“ სხვა წარმომადგენელს ამ ინციდენტზე შეხვედრის შემდეგ კომენტარი არ გაუკეთებია.
